Msiba Dar es Salaam

MUME wa Mwandishi wa habari, Margareth Chambiri, amekufa katika ajali ya gari mjini Lindi.

Kwa mujibu wa ndugu wa Margareth, Aminata Juma, Kennedy Chambiri alikufa papo hapo katika ajali hiyo iliyotokea jana asubuhi wakati akienda katika ofisi za TANROADS mjini humo.

Inadaiwa kwamba Kennedy alikywa akiendesha Pick Up, alimpa lifti mwanamke aliyekuwa na mtoto, muda mfupi baadaye gari hiyo lilipinduka yeye (Kennedy) na mtoto huyo wakafa papo hapo.

Haijafahamika kama gari alilokuwa akiendesha liligonga mti, kitu au kugongana na gari lingine.

Maiti ya Kennedy imefikishwa katika Hospitali ya Taifa Muhimbili leo asubuhi.

Aminata amesema, wafiwa na waombolezaji watakutana nyumbani kwa marehemu Kawe kesho kuanzia saa nne asubuhi kwa ajili ya ibada ya mazishi itakayoanza saa saba mchana katika kanisa la wasabato Kinondoni.

Baada ya ibada, mwili utapelekwa Uwanja wa Ndege wa Julius Nyerere Dar es Salaam kwa ajili ya kusafirishwa Jumapili kwenda Tarime kwa ajili ya mazishi na maziko.

Mwili wa Kennedy utazikwa Jumatatu. Mungu ailaze roho ya marehemu mahala pema peponi, amen.

Kwa wasiomfahamu, Kennedy ni baba mzazi wa yule mtoto aliyeimba wimbo Tanzania eeeh, Martina Chambiri.