Dk Mwakyembe apinduka na gari

MBUNGE wa Kyela, Dk Harrison Mwakyembe amelazwa katika Hospitali ya mkoa wa Iringa, alipinduka na gari leo saa moja asubuhi.

Kaimu Mganga Mkuu wa hospitali hiyo, Oscar Gabone ameshauri aletwe Dar es Salaam kwa ajili ya uchunguzi zaidi.

Dk Gabone amesema, Mbunge huyo amejigonga katika upande wa kushoto wa taya lakini hali yake si mbaya.

Kamanda wa Polisi mkoa wa Iringa, Advocate Nyombi amekaririwa akisema kuwa, gari alilokuwa akisafiria Dk Mwakyembe lilipinduka saa 1.10 asubuhi katika mteremko wa Ihemi.

Gari hilo aina ya Toyota Land Cruiser lenye namba za usajili T 362 ACH lilipinduka baada ya kulipita lori.

Kuna taarifa kwamba ofisi ya Bunge imetuma ndege binafsi ikamchukue kumleta Dar es Salaam kwa ajili ya matibabu zaidi.

Dereva wake hakuumia ila anasema anasikia maumivu ya kichwa.