Big Brother feki yawaadhiri wasichana

Wanawake tisa wa nchini Uturuki wamejikuta wakiadhirika kuona picha zao za utupu zikizagaa kwenye internet baada ya kuingia kwenye mtego wa jamaa waliozindua mashindano feki ya Big Brother.

Wanawake hao wenye umri wa kati ya miaka 16 na 24 wakidhani kuwa walikuwa kwenye mashindano ya kweli ya Big Brother , walifungiwa kwenye jumba kubwa la kifahari wakipigwa picha na video kwa takribani miezi miwili.

Badala ya kupata umaarufu na zawadi za pesa kwa kuwa nyota kwenye Big Brother, picha za utupu za wanawake hao ziliuzwa kwenye internet.

Big Brother hiyo feki ilivumbuliwa na polisi baada ya wazazi wa wanawake hao kushangazwa na kutoonyeshwa kwa mashindano hayo ya Big Brother kwenye televisheni yoyote ya Uturuki.

Maafisa wa polisi walilivamia jumba hilo lililopo kwenye jiji la Istanbul na kufanikiwa kuwaokoa wanawake hao.

Wanawake hao waliingia kwenye mtego wa Big Brother hiyo feki baada ya kuona matangazo kwenye internet yakitafuta washiriki wa mashindano mapya ya Big Brother ya Uturuki yanayoenda kwa jina la "Biri Bizi Gozetliyor" (BBG).

Waandaaji wa Big Brother hiyo feki waliwasainisha wanawake hao mkataba wa kukaa kwenye jumba hilo kwa miezi miwili.

Wanawake hao walisainishwa pia mkataba unaowataka walipe faini sawa na Tsh. Milioni 45 iwapo wangejitoa kwenye mashindano hayo.

Awali wanawake hao walifurahi kukuta jumba hilo la kifahari likiwa na kila kitu ndani pamoja na bwawa la kuogelea.

Lakini baada ya wiki chache wanawake hao waligundua kwamba mambo hayajakaa sawa kwenye mashindano hayo kwani kulikuwa hakuna michezo yoyote baina yao na hakuna mtu aliyekuwa akitolewa mwishoni mwa wiki.

Wakati walipotaka kujitoa, waliambiwa watoe kwanza pesa za faini walizokubaliana awali ndipo waruhusiwe kutoka.

Hakuna mshiriki yoyote aliyekuwa na uwezo wa kulipa faini hiyo hivyo waliamua bora waendelee kukaa kwenye jumba hilo mpaka miezi miwili itakapoisha.

Wakati polisi walipowasili kwenye jumba hilo, waliwasikia wanawake hao wakipiga kelele za kuomba msaada.Wanawake hao waliokolewa jumapili iliyopita.