Sophia Simba- Mtoto wa Sista aliyesomeshwa kwa fedha za pombe

Sophia Simba akiingia katika ukumbi wa mikutano wa Chuo Cha Mipango, Dodoma Oktoba 20,2012 kwa ajili ya Uchaguzi Mkuu wa UWT. Katika uchaguzi huo, Waziri Simba alishinda.

Raia Mwema: Wasomaji wetu wangependa kukufahamu kwa sababu mengi yamekuwa yakisemwa na yakinong’onwa hususan kuhusu elimu yako; labda kwa vile hawaifahamu vizuri. Unaweza kutupa CV yako kwa kifupi?

Mama Sophia Simba: Asante kwa kunipa nafasi hii adimu. Nimefurahi kwamba umeweza kufika ofisini kwangu na kuweza kuongea na mimi. Nashukuru kwamba umeona upo umuhimu wa watu kunijua mimi Sophia ni nani hasa.

Ni kweli maneno mengi yamekuwa yakisemwa ambayo hayapendezi, lakini nitafanyaje? Kwa hiyo, kwa kifupi sana ningependa nikufahamishe labda pengine kwa kupitia wewe watu watanifahamu.

Mimi naitwa Sophia Simba. Ni Sophia Mathew Simba. Nyambi ni jina langu la nyumbani. Wazaramo wana majina yao ya ukoo, kwa hiyo mimi ni Nyambi na mdogo wangu alipewa jina lingine. Nilipokuwa mdogo baba yangu akasema huyu ni Nyambi.

Kwa kifupi sana, mimi ni mtoto wa mfanyabiashara. Baba yangu alitokea Kisarawe, kijiji kinachoitwa Sungwi. Baba yangu alisoma Minaki. Alipomaliza Minaki alirudi hapa Dar es salaam. Baba yangu aliwahi kufanya kazi mpaka ya uvuvi. Aliacha shule kutokana na umbali kutoka kijijini kwake Sungwi kwenda Minaki.

Watoto waliokuwa wakitoka bara walikuwa wanasoma boarding, lakini watoto wa Kisarawe wenyewe walikuwa wanatakiwa watembee umbali mrefu. Kwa hiyo, kutokana na hiyo alifikia mahali haikuwezekana.

Baba yangu mwanzoni alikuwa Mwislamu. 

Alikuwa anaitwa Omari Simba. Kutokana na kusoma pale Minaki, aliamua kubadilisha dini. Baba yangu alibatizwa katika Kanisa la St. Albans – hili la hapa mjini. Na baada ya hapo baba yangu aliondoka akaenda Morogoro kufanya shughuli za biashara.

Kule alikutana na mama yangu, mwanamke wa Kiluguru ambaye naye historia yake alikuwa Sister wa Roman Catholic. Kwa hiyo walikutana na wakaoana.

Katika maisha yetu yote tumeishi kama Wakristu wa Roman Catholic. Mpaka leo mimi ni Mroman Catholic ingawaje kila mtu ananipa dini ambayo anaitaka. Kwa hiyo, mimi ni mmoja wa watoto tisa. Mimi ni wa pili.

Raia Mwema: Makazi yenu hasa yalikuwa wapi?

Mama Sophia Simba: Makazi yetu yalikuwa Dar es salaam na Morogoro. Dar es Salaam tuliishi Bungoni, Ilala. Lakini tukiwa wadogo kabisa baba yangu alijenga nyumba yake ya kwanza kabisa Morogoro, Kwa Kingu.

Alifanikiwa sana kwa shughuli za baa. Mimi ni mtoto ambaye nimesomeshwa kwa pesa za pombe. Baba yangu alikuwa na baa inayoitwa Uzaramo Bar, Morogoro lakini pia alikuwa na baa inayoitwa Simba Bar. Kwa hiyo, mimi kufungua vizibo vya bia najua.

Nikiwa bado mdogo nilikuwa nauza mishikaki. Siku zote nyumba yetu ilikuwa upande baa, upande tunaishi sisi. Kwa hiyo, baba yangu aliendelea na shughuli za baa muda mrefu.

Raia Mwema: Ulianza shule wapi?

Mama Sophia Simba: Mimi nilianza shule Morogoro katika shule inayoitwa Kilakala, baada ya hapo nikapelekwa shule ya boarding inayoitwa Ilonga Middle School, Kilosa. Baada ya hapo nikasoma Forest Hill Secondary School. Sisi ndiyo waanzilishi wake.

Ule mwaka ambao wanafunzi wengi tuliambiwa hatukuchaguliwa tuliunganishwa darasa la saba na la nane. Kwa hiyo sisi tulimalizia darasa la nane. Huo ulikuwa mwaka 1965. Shule nyingi (za binafsi) zilianzishwa mwaka huo. Shule za Kibohehe, Forest Hill, Mzizima na Kinondoni, zote zilianza wakati huo.

Baada ya pale nikaenda Kibosho Secondary School. Kwa bahati mbaya baba akafariki, wakati huo nikiwa nafanya kazi NDC. Kabla hajafariki, baba alitaka sana nifanye shughuli za biashara, niendeleze biashara ya familia.

Baada ya kumaliza shule nilichaguliwa nikasomee ualimu lakini sikwenda, na badala yake nikapata kazi NDC. Hapo NDC nilianza kazi 1971 hadi mwaka 1979.

Baada ya hapo nikaingia Lonrho Group of Companies baada ya kuacha kazi NDC. Kutoka pale nikaanza kazi Metal Engineering Industries Development Association (MEIDA) ambayo ilianzishwa na Waswedish. Nikiwa hapo nikaamua kwenda kusoma. Nilianza mafunzo ya Certificate of law mwaka 1985. Nilipenda sana kusomea sheria.

Mwaka 1987 nilianza kusomea shahada ya sheria katika Chuo Kikuu cha Dar es Salaam, na nikahitimu mwaka 1992 au 1993. Kuna mwaka hapo katikati chuo kilifungwa kwa sababu ya kuwapo mgomo.

Baada ya kuhitimu Chuo Kikuu nikarudi kufanya kazi Metal Industries; kwani wakati nasoma walikuwa wamenipatia likizo isiyokuwa na malipo. Baada ya kurudi walinipandisha cheo kuwa legal and administrative officer; kwani kabla ya kwenda chuo kikuu cheo changu kilikuwa administrative officer tu.

Wakati niko NDC nilikuwa katibu wa tawi la UWT la NDC na Mama Anna Mkapa alikuwa mwenyekiti wetu, tulifanya mambo mengi mazuri.

Nilipokuwa MEIDA niliomba pia kuwa diwani wa viti maalumu. Kulikuwa na uchaguzi mwaka 1993 au 1994. Nikawa diwani hadi 1995. Mwaka 1995 wakasema kuna viti maalumu vya ubunge kwa akina mama. Mimi nikagombea vitu maalumu.

Mwaka huo wa 1995 nilipata invitation ya kwenda Beijing, China kuhudhuria mkutano wa wanawake duniani. Nikakataa, nikampa mwenzangu nikamwambia mimi siendi nitabaki hapa kwa ajili ya kampeni za ubunge. Sikwenda mimi Beijing kwa sababu ya kampeni hiyo. Kwa hiyo mwaka 1995 Nikashinda, na hivyo nikaingia bungeni.

Mwaka 1995 nilifanya mafunzo ya Post Graduate Diploma on Women Law kwenye Chuo Kikuu cha Zimbabwe na mwaka 2005 nilifanya Masters ya Community Economic kwenye Chuo Kikuu Huria cha Tanzania. Thesis yangu ilikuwa Women and Economic Empowerment in Tanzania.

Mwaka 1972 mimi niliolewa. Mume wangu alikuwa ni mwanasheria wa Chama cha Ukombozi cha Afrika Kusini cha ANC. Siku zile walikuwa wakiwaita wakimbizi, lakini wenyewe walikuwa wanataka waitwe freedom fighters.

Mume wangu aliruhusiwa pia kufanya kazi za uanasheria nchini. Kabla ya kufariki aliwahi kufanya kazi pia benki. Alikuwa anaitwa Clifford Zex Senge. Wengi walikuwa wanamwita kwa jina la Cliff. Wanasheria wengi wanamjua.

Kwa hiyo, niliolewa na Cliff na nikazaa naye watoto wawili. Watoto hao walikwenda Afrika Kusini kwa baba yao lakini sasa wote wamerudi. Maisha ya Afrika Kusini ni magumu hayako that easy.

Kuna watu wanasema mimi ni kituo cha polisi, wanaume wananikimbia. Nilisoma kwenye gazeti (eti) wanaume hawanitaki. Lakini I was married.

Raia Mwema: Uliolewa na Msouth Afrika na kwa bahati mbaya akafariki dunia. Lakini nasikia ulikuwa na mahusiano na ulionekana mwaka 1995 ukiwa na Kitwana Kondo, Meya wa zamani wa Dar es Salaam na mbunge wa zamani wa Ilala. Uhusiano wako na yeye ulikuwa wa aina gani?

Mama Sophia Simba: Sawa, mimi nilikutana na Mzee Kondo… Kwanza nakubali nilikuwa na mahusiano naye, na nimezaa naye mtoto wa kiume. Nilikuwa na Mzee Kondo kutoka mwaka 1975. Nilikutana naye wakati akigombea ubunge; mimi nikiwa kama mpiga debe wake. Kwa hiyo tulikutana mwaka 1975 na tukaachana mwaka 1983.

Siyo kama tulioana, hapana, alikuwa boyfriend. Yeye siku zote amekuwa na mke wake. Kwa hiyo, nilizaa naye kweli mtoto mmoja na mpaka sasa hivi mimi namuheshimu Mzee Kondo. Na baada ya hapo, mwaka 1983, ameshaoa mara mbili au mara tatu lakini mimi bado namheshimu mpaka watu hawaelewi mahusiano yangu mimi na yeye yakoje.

Hata tulipokwenda bungeni watu wengine walidhania ni mtu na mkewe, lakini mimi sijaolewa na Kitwana Kondo. Namheshimu sana, ni baba wa mtoto wangu.

Raia Mwema, Tanzaniteglamour