Kisasi cha mapenzi chadaiwa kusababisha kifo cha RPC Barlow

 

Kamanda Liberatus Barlow

TUKIO la kuuawa kwa Kamanda wa Polisi Mkoa wa Mwanza, Liberatus Barlow sasa linahusishwa na kisasi cha mapenzi, imefahamika.
 

Polisi tayari wamemkamata mtu mmoja anayedaiwa kuwa na uhusiano wa kimapenzi Mwalimu Dorothy Moses.

Siku ya tukio, usiku wa kuamkia Jumamosi iliyopita, mwalimu huyo alikuwa na Kamanda Barlow hadi wakati RPC huyo anapigwa risasi nje ya nyumba anapoishi mama huyo anayedaiwa kuwa mjane.

Kuna taarifa zinazodai kwamba, Mkurugenzi wa Makosa ya Jinai, DCI, Robert jana alithibitisha kukamatwa kwa mtu huyo (jina tulihifadhi) akisema: 

“Ni kweli mtu mmoja amekamatwa, lakini kwa sasa siwezi kuzungumzia kwa kina kuhusu suala hilo kwa sababu bado tunamhoji na tunaendelea na uchunguzi. Tutakapokamilisha, tutatoa taarifa.”

Kaimu Kamanda wa Polisi Mkoa wa Mwanza, Lily Matola pia alithibitisha kukamatwa kwa mtuhumiwa huyo. Hata hivyo, alisema amesikia habari hizo kwa kuwa yuko safarini kwenda mkoani Kilimanjaro kwenye mazishi ya kamanda huyo... 

“Hayo nimesikia, lakini kwa sasa sipo Mwanza hivyo siwezi kuzungumzia lolote.”

Habari za uhakika kutoka ndani ya Jeshi la Polisi, zinadai kuwa, upelelezi wa mauaji hayo umefanikiwa kwa hatua kubwa.

Mtu huyo alikamatwa Dar es Salaam baada ya kuwekewa mtego na makachero waliopo katika timu ya uchunguzi na alisafirishwa hadi Mwanza ambako anashikiliwa na jeshi hilo.

Ilielezwa kuwa mtu huyo alikamatwa kutokana na kuwapo kwa taarifa za siri za kiitelejensia kutoka kwa watu mbalimbali.

“Kuna hali imefunguka na imesaidia sana. Inaonyesha kwamba Dorothy alikuwa na uhusiano na mtu huyu ambaye alikuwa akifika nyumbani kwake, kama mumewe na watu wanajua jambo hili,” alieleza mmoja wa askari polis.

Alisema kwamba uchunguzi wa awali unaonyesha kwamba uamuzi wa mwalimu huyo kusitisha uhusiano wa mapenzi na mtu huyo huenda ndicho chanzo cha mauaji hayo lengo likiwa ni kumshawishi Dorothy kurejesha uhusiano.

 Mwalimu Doroth Moses aliyekuwa na RPC Barlow

“Mimi natambua kwamba huyu jamaa na Dorothy walikuwa na uhusiano na inajulikana mjini kuwa hata mke wa mtuhumiwa anatambua jambo hilo kwani walishagombana siku moja mjini na hata katika msiba nyumbani kwao na mtuhumiwa,” alisema mama mmoja (jina tunalo), aliyejitambulisha kama mmoja wa marafiki wa karibu wa Dorothy.

Mwanafunzi wa Shule ya Sekondari Kitangiri (jina tunalo), anasema amekuwa akimfahamu mtuhumiwa aliyekamatwa kama baba mwenye nyumba hiyo na kila mara amekuwa akimkuta hapo nyumbani wakati wa kujisomea na wanafunzi wenzake.

“Mimi ninamfahamu kama baba wa rafiki yangu na nimewahi kumkuta wakati wa kujisomea hapo nyumbani na watoto wa nyumba hiyo.”

 Hili ndilo geti la nyumba anayoishi Mwalimu Doroth Moses, katika eneo la Kitangiri jijini Mwanza.

Pembeni ya geti hilo ndipo alipouawa Kamanda wa Polisi Mkoa wa Mwanza, Liberatus Barlow.

Dorothy ambaye ametajwa kuwa mjane, ni Mwalimu katika Shule ya Msingi Nyamagana na tangu kufariki dunia kwa mumewe Ofisa wa zamani wa TRA, Modest Lyimo mwaka 1997.

“Watu wote wanajua kwamba mtuhumiwa alikuwa akitembea na huyo mwalimu, wameonekana mara nyingi wakiwa muziki,” alieleza mmoja wa ndugu wa karibu wa mke wa mtuhumiwa.

Blog za Mikoa