Afungwa jela kwa kuoa marafiki kwa siri

Wanawake wawili wa nchini China waliokuwa marafiki baada ya kuanza kazi kiwandani walipigwa na butwaa walipogundua kuwa wameolewa kwa mume mmoja na wote wamezaa naye mtoto mmoja.

Bwana Cui Bin, 42, mkazi wa Zhengzhou, amehukumiwa kwenda jela miezi mitatu kwa kufunga ndoa na wanawake wawili bila wanawake hao kufahamu, limeripoti gazeti la Dahe Daily.

Bin alimuoa kwanza Zhang Dandan na kufanikiwa kupata mtoto wa kike, lakini akawa na hamu ya kupata mtoto wa kiume.

"Nilitaka siku zote niwe na mtoto wa kiume, lakini kutokana na sheria za China zinazoitaka kila familia kuwa na mtoto mmoja tu ilinibidi nitafute mwanamke mwingine wa siri" alikiri Bin.

Baada ya kuona amepata mtoto wa kike kwa mke wake wa kwanza, Bin aliamua kumuoa mwanamke mwingine aliyeitwa Wang na kufanikiwa kuzaa naye mtoto wa kiume.

Bin aliugawanya muda wake kwa wake zake wote wawili huku akitumia sababu mbali mbali wakati alipokuwa akitoka kwa mke mmoja kwenda kwa mwingine.

Wakati huo huo Zhang na Wang walikutana kazini na kugeuka kuwa marafiki kutokana na kupenda kuimba miziki ya Karaoke, hawakuwahi hata siku moja kufikiria kwamba walikuwa wameolewa na mume mmoja.

Wang alikuwa akijua kuwa mume wa rafiki yake alikuwa anafanya kazi za ujenzi mji mwingine.

Zhang naye kwa upande wake alikuwa akijua kuwa Wang alikuwa ameolewa hivi karibuni lakini hakuwahi kumtembelea nyumbani kwake.

Ukweli wa mambo uliibuka wakati Wang alipoanza kuhisi mume wake ana kimada nje baada ya kumsikia mumewe akiongea na mwanamke mwingine kwenye simu.

Wang alichukua simu ya mumewe na kuipiga namba ya mwisho kupigwa na ndipo alipopigwa na butwaa alipobaini kuwa alikuwa akiongea na mke mwenza.

"Nilipiga namba ya mwisho kwenye simu yake na mwanamke alinijibu kwa kusema kuwa yeye ni mke wa Bin, kwa kuwa tulikuwa tukifahamiana kwa sauti, moja kwa moja tulijuana" alisema Wang.