Gazeti la Mwanahalisi lapigwa stop!

 
Mhariri Mtendaji wa Mwanahalisi, Said Kubenea.

GAZETI la Mwanahalisi limefungiwa kwa muda usiojulikana kwa madai kuwa linachapisha habari na makala zisizo na tija kwa jamii. 

Kaimu Mkurugenzi Idara ya Habari (MAELEZO), Phabian Lugaikamu, amesema leo jijini Dar es Salaam kuwa, katika toleo la gazeti hilo namba 302, 303 na 304 ya mwaka 2012 na mengine yaliyotangulia yalichapisha habari na makala zenye kueneza na kujenga hofu kwa jamii.

 

“Mhariri wa gazeti la Mwanahalisi ameitwa na kuonywa mara nyingi lakini hataki kukiri kuwa maudhui ya makala zake hazina tija kwa jamii,pia hazifuati weledi na maadili ya taaluma ya uandishi wa habari”amesema wakati anasoma tamko la Serikali.

Lugaikamu amesema, mhariri huyo mara zote katika utetezi wake amekuwa akinukuu kifungu cha 18 cha katiba ya nchi kinachotoa uhuru wa kutoa maoni na kwa makusudi kutokunukuu kifungu ca 30 cha katiba hiyo kinachoweka ukomo wa uhuru.

 

“Serikali imeamua kulifungia gazeti hilo kutochapishwa kwa muda usiojulika kwa mujibu wa sheria ya magazeti ya mwaka 1976, kifungu namba 25(i),adhabu hiyo itaanza tarehe 30 julai,2012 kwa mujibu wa tangazo la serikali namba 258 lililochapishwa katika gazeti la Serikali na kutolewa jijini Dra es salaam julai 27,2012”amesema.