Naibu Spika alivyomtoa Mnyika bungeni

 Mbunge wa jimbo la Ubungo, John Mnyika akichangia mjadala wa bajeti bungeni mjini Dodoma kabla ya kutolewa nje ya ukumbi huo na Naibu Spika, Job Ndugai.

 Mbunge wa jimbo la Ubungo, John Mnyika (CHADEMA) akitoka ndani ya ukumbi wa bunge, mara baada ya Naibu Spika wa Bunge la Tanzania, Job Ndugai kumuamuru atoke kwa kuwa alikataa  kutii amri ya kumtaka kufuta kauli.

 Mbunge wa jimbo la Ubungo, John Mnyika akitoka katika ukumbi wa Bunge la Tanzania mjini Dodoma baada ya kukataa kufuta kauli iliyodaiwa kumdhalilisha Rais wa Jamhuri ya Muungano wa Tanzania kuwa dhaifu.

 Askari wa Bunge akimuongoza Mh. John Mnyika.

 Askari wa Bunge wakihakikisha Mbunge wa Ubungo Mh. John Mnyika akiondoka katika eneo la viwanja vya Bunge baada ya Naibu Spika, Job Ndugai kumtoa nje ya ukumbi wa Bunge.

 

  John Mnyika akiongea na Waandishi wa Habari baada ya kutoka nje ya ukumbi wa Bunge mjini Dodoma.

 Askari Polisi wa Bunge, wakimwamru Mbunge wa jimbo la Ubungo, John Mnyika (Chadema), kuondoka maeneo ya bunge, baada ya kutolewa nje na Naibu Spika, Job Ndugai kutokana na kukataa kuondoa hoja yake 

 .

 

Askari Polisi wa bunge walilisindikiza gari lililombeba mbunge wa Ubungo, John Mnyika mara baada ya kutolewa nje na Naibu Spika, Job Ndugai

Mbunge huyo alitoa kauli hiyo wakati akichangia Bajeti ya serikali ya mwaka 2012/13 katika mkutano unaoendelea.

Mnyika alisema, bajeti iliyowasilishwa bungeni haitekelezi ilani ya CCM wala mpango wa maendeleo wa miaka mitano ambao wabunge walipitisha.

Mnyika alisema umaskini wa Mtanzania na kilio cha maji nchi nzima kimetokana na udhaifu wa rais wa nchi, upuuzi wa CCM na uzembe wa wabunge.

“Ubovu wa bajeti hii ni matokeo ya udhaifu wa Rais Kikwete, yeye ndiye aliyesaini Mpango wa Taifa wa miaka mitano kama Kiongozi Mkuu wa nchi tena kwa wino mwekundu kama Amiri Jeshi Mkuu.

“Na yeye ndiye mwenyekiti wa baraza la mawaziri, bajeti hii iliyoacha kuzingatia Mpango wa Taifa imepita kwenye baraza aliloliongoza, pia kushindwa kutekelezwa kwa bajeti iliyopita ni matokeo pia ya udhaifu wa taasisi ya urais.

 “Kwa mujibu wa Katiba rais ndiye ambaye anapeleka bajeti bungeni, waziri mwenye dhamana anapeleka tu kwa niaba. Rais amepewa mamlaka makubwa juu ya bajeti, ibara ya 99 imeweka mipaka kuhusu mambo ambayo Bunge lina mamlaka nayo huku ibara ya 90 inasema Bunge likiikataa bajeti, rais ana mamlaka ya kuvunja Bunge.

Waziri wa Nchi Ofisi ya Waziri Mkuu, William Lukuvi, alitoa utaratibu na kudai kwa mujibu wa kanuni za Bunge namba 61 Mnyika alitumia maneno ya kuudhi kwa kumwita Rais Kikwete kwa kumtaja jina kuwa ni dhaifu na kusema CCM ni upuuzi.

“Nataka niseme kuwa katika watu ambao nawaheshimu ni Mheshimiwa Mnyika, tena nasema kutoka moyoni lakini kwa hili mdogo wangu umepotoka, kwa mujibu wa kanuni mbunge yeyote haruhusiwi kumtaja mtu yeyote ambaye hayumo humu ndani ya Bunge, maana hawezi kupata nafasi ya kujitetea, hivyo ni vema ukafuta kauli hiyo,” alisema Lukuvi.

Naibu Spika Job Ndugai alikubaliana na hoja ya Lukuvi ya kumtaka Mnyika kufuta kauli yake lakini Mnyika hakuwa tayari kufuta kauli yake ya kumwita Rais Kikwete dhaifu, hata alipoombwa tena kufanya hivyo na naibu spika.

Kutokana na hali hiyo, Ndugai alitumia kanuni ya 73 (2) (3) ya kumtaka mbunge huyo atoke nje.

“Sasa ndugu wabunge humu ndani tunaendeshwa kwa kanuni na kwa kuwa mimi ni Naibu Spika wa uhakika sasa ni lazima nihakikishe sheria zinafuatwa.

“Kutokana na kanuni ya 73 kifungu cha 2 na 3, kifungu cha 2 kinaeleza mbunge yeyote haruhusiwi kutumia lugha ya kuudhi wala matusi na mbunge akifanya hivyo anatakiwa kufuta kauli yake kwa maelekezo ya Spika kwa kutumia kanuni zilizopo na endapo mbunge huyo atashindwa kufuta kauli hiyo anatakiwa kutolewa nje hadi muda wa shughuli za Bunge uliobaki uishe.

“Kifungu cha tatu kinaelekeza kuwa Mbunge ambaye atatakiwa na Spika kutoa uthibitisho kwa jambo ambalo alilisema bungeni na kushindwa kufanya hivyo anaweza kufutiwa vikao vitano mfululizo vya Bunge, sasa kifungu cha 3 nakiacha kutokana na Mheshimiwa Mnyika kushindwa kufuta kauli yake, sasa nawaagiza askari wangu waliopo hapa ndani kumtoa John Mnyika nje ya ukumbi wa Bunge,” alisema Ndugai.